ಚಿತ್ರ

ಚಿತ್ರ

ಸುತ್ತಲಿನ ಭೂಮ ಜಗತ್ತಿನ ಬೆಳಕು
ಕಣ್ಣಿನ ಓರೆಕೋರೆಯ
ಕೊರಕಲುಗಳನ್ನು ದಾಟಿ
ಹೃದಯದ ಆಳಕ್ಕಿಳಿದು ಭಾವನೆ,
ಅನುಭವಗಳನ್ನು ಕಟ್ಟಿಕೊಂಡು
ಕಾಲನ ನಿಮಿಷಗಳಲ್ಲಿ ಸೋಸಿ, ಸೋಸಿ
ಹಸ್ತದಲ್ಲಿ ಜಾರಿ, ಬೆರಳುಗಳನ್ನು ಮುತ್ತಿಕ್ಕಿ
ಹಾಳೆಯ ಮೇಲೆ ಹರಿದಾಡಿದಾಗ
ಮೂಡುತ್ತದೆ. ಚಿತ್ರ

ಕ್ಷಣವನ್ನು ಸಾವಿರ ತುಂಡುಮಾಡುವ
ಯಂತ್ರದಂತಲ್ಲ ಅದು...

ಅದು ಮಾನುಷ ಚಿತ್ರ, ಸಾವಿರ ಕ್ಷಣಗಳನ್ನು
ಜೋಡಿಸುತ್ತದೆ, ಭವದ ಬಾಯಾರಿಕೆಗಳನ್ನು
ತಣಿಸುತ್ತದೆ.

- ಪ್ರಸನ್ನ ರೇವನ್

ಯಾವ ಕವಿತೆ?

ಯಾವ ಕವಿತೆಯು ನಿನ್ನ
ಹೃದಯವನು ಹೊಕ್ಕಿಹುದು?

ಹನಿಗಣ್ಣ ಹಿಂದಿರುವ
ಆರ್ದ್ರ ಮನಸಿನ ಒಳಗೆ
ಬಣ್ಣ ಬಳಿದು ಓಕಳಿಯಾಡಿ
ಮೌನದಂಗಳದಿ ಕುಪ್ಪಳಿಸಿ

ಸದ್ದಿರದ, ನುಡಿಯಿರದ
ಹಾಡೊಂದನು ಉಳಿಸಿ,
ನಗಿಸಿ, ಅಳಿಸಿ, ಮರೆಸಿ
ಕನಸಿನ ಹಸಿರುಮರಗಳ
ನಡುವೆ ಮುತ್ತಿಡುವುದು?

ಯಾವ ಕವಿತೆ ನಿನ್ನ
ಹೃದಯವನು ಹೊಕ್ಕಿಹುದು?

-ಪ್ರಸನ್ನ ರೇವನ್