Saturday, November 19, 2011

ಬರೆಯಲಾಗದ ಕವಿತೆಗಳು

ಬರೆಯಲಾಗದ ಕವಿತೆ
ಕದ್ದು ನೋಡಿದ ಕನಸು
ಬಿದ್ದರೂ ಬದಲಾಗದ ರೂಪ
ಎದ್ದೆದ್ದು ಓಡುತ್ತಿರುವ ಬದುಕು

ಯಂತ್ರಗಳ ಸ್ನಿಗ್ಧತೆಯಲ್ಲಿ
ದೂರ ದೂರ ಸೂರ್ಯನ ಬೆಳಕು
ಕನ್ನಡಿಯೊಳಗಿನ ಮಾಯೆಯ ಥಳಕು
ಭದ್ರವಾಗಿದ್ದೂ ಬಳುಕುವ ಬದುಕು

ನಿರಂತರ ಬೀಸುವ ಬೆಳಕಿನ ಗಾಳಿ
ಸುಯ್ಯನೆ ಹುಯ್ದು ಬೆಚ್ಚಗಾಗಿಸುವ ಮಳೆ
ಅಚ್ಚ ಹಸುರಿನ ಕನಸುಗಳ ಮಧ್ಯೆ
ಹಣ್ಣು ಹಣ್ಣು ಮನಸು!

-ಪ್ರಸನ್ನ ರೇವಣ್ಣ

Monday, July 11, 2011

ಗೇಯ ಗೀತೆ

ಅಣು, ವಿಸ್ತಾರಗಳನ್ನೆಲ್ಲ ಕಳಚಿ ಸಿಡಿದು
ಭೂಮಿ, ಭೂಮಗಳನ್ನೆಲ್ಲ ಮಿಕ್ಕಿ ಮೊರೆದು 
ಅಂತರಾಳದಲ್ಲಿ ಕುಗ್ಗಿ ಬಸವಳಿದ ಭಾವನೆಗಳನ್ನೆಲ್ಲ ನಭಕ್ಕೆಸೆದು
ಚಿಮ್ಮಿ, ನುಗ್ಗಿ, ಹರಿದು, ಹರಿಯುತ್ತೇನೆ
ಸ್ವಾತಂತ್ರದ ಬೆಳುಮುಗಿಲಿನೆಡೆಗೆ,
ಸ್ವಚ್ಚಂದ ಪರಿಸರದಲ್ಲಿ ಕರಗಿ,
ಬೆಳಕಿನಲಿ ಬೆಳಕಾಗಿ, ಕತ್ತಲೆಯಲ್ಲಿ ಕತ್ತಲಾಗಿ
ನನ್ನೊಳಗೊಂದಾಗಿ ಬದುಕುತ್ತೇನೆ, ಬದುಕಿಸುತ್ತೇನೆ!

-ಪ್ರಸನ್ನ ರೇವನ್

Tuesday, May 03, 2011

ಮರಳಿನಲ್ಲಿ ಬಿದ್ದ ಮಳೆಹನಿಗಳು

ಕಳೆದು ಹೋಗುತ್ತವೆ ನಮ್ಮ ಕನಸು, 
ಕನವರಿಕೆ, ನೆನಪು ಮತ್ತು
ಅಂತರ್ಮುಖಿ ಸಂವಾದಗಳು
ಪ್ರತಿಮೆ, ಉಪಮೆ, ರೂಪಕಗಳಲ್ಲಿ

ಮರಳಿನಲ್ಲಿ ಬಿದ್ದ ಮಳೆಹನಿಗಳಂತೆ
ಸ್ವಪ್ನದಲಿ ಕೊಟ್ಟ ಮುತ್ತಿನಂತೆ
ಹೃದಯದ ದಟ್ಟ ತಿಮಿರದಲ್ಲಿ 
ಆಗಾಗ ಮೂಡುವ ರಾಗಗಳಂತೆ!

-ಪ್ರಸನ್ನ