ಅಮ್ಮ...
ಸಂಭವಿಸಿದೆ ಕಡುಹಳದಿಯ
ಆಗಸದಲಿ ರವಿಯುದಿಸಿದದಂತೆ
ಆ ಕೊನೆಮುಟ್ಟದ ಆಗಸ
ನೀನಲ್ಲವೇನು?
ತಿರುತಿರುಗಿ ನಿಂತೆ ನೀಲಿಕಡಲ
ದೂರ ತೀರವ ತಲುಪಿದ ಚಿಪ್ಪಿನಂತೆ
ಪಾರಾವಾರವ ಬಳಸಿದ ದಡ
ನೀನಲ್ಲವೇನು?
ಜಯಿಸಿ ಬಂದೆ ಕರಿ ಮತಂಗದೆತ್ತರದ
ಪುಸ್ತಕವನುಂಡ ಸಾರಸ್ವತನಂತೆ
ಎಡವಿದೊಡೆ ಮಸ್ತಕದಿ ಹೊಳೆವ ಪದ
ನೀನಲ್ಲವೇನು?
ಅಪ್ಪನೆನೆಸಿಕೊಂಡೆ ಕೆಂಗೆನ್ನೆಯ
ಮುಗುದೆಯರ ಸವಿಮಾತಿನಂತೆ
ಆ ಎಳೆಪಾದಗಳು ನನ್ನೆದೆಯಲಿ ಮೂಡಿಸಿದ ಅಚ್ಚು
ನೀನಲ್ಲವೇನು?
ಯಾರೂ ಹೇಳಿಕೊಡದ ಮೊದಲ ಪದ
ಕೊನೆಯುಸಿರವರೆಗೂ ಮರೆಯದ ಪದ್ಯ
ನೀನಲ್ಲವೇನು?
- ಪ್ರಸನ್ನ
