ಕನಸುಗಳೇ

ಕನಸುಗಳೇ

ನಯನಗಳೊಳಗೆ ಅವಿತಿರುವ ಕನಸುಗಳೇ
ಹೃದಯದ ಕಂದರವನ್ನೊಡೆದು ಬನ್ನಿ
ಬನ್ನಿ ನನ್ನ ಸವ್ಯದ ಭವಿತವ್ಯಕೆ

ಸನ್ನಿಹಿತವೆನಿಸುವುವು ಎನ್ನ ಅಂತರಂಗದ
ಮಿದುವು, ಸೆಡವು, ಅಪರೋಕ್ಷ ರೂಕ್ಷತೆಗಳು
ವಿದ್ಯೆ, ಚೆಲುವು, ಪ್ರೀತಿ, ಇತ್ಯಾದಿ

ಕಾಲಕಾಲಗಳನ್ನು ಮೀರಿ, ಹೆಜ್ಜೆ,
ಗೆಜ್ಜೆಗಳನು ದಾಟಿ, ಎಡವಿ, ಎಗರಿ
ಕಮರಿ, ಕಲಕಲನೆ ಕಲೆತು, ಅಮರಿ

ಬನ್ನಿ ಸಾಕು ನನ್ನೆಡೆಗೆ, ನನ್ನೆದೆಗೆ
ಹನಿಯಾಗಿ, ಇಹವಾಗಿ, ನಿಜವಾಗಿ
ನನ್ನ ಇಹದ ಅನಿಮಿಷದ ಬದುಕಿಗೊಮ್ಮೆ ಬನ್ನಿ

-ಪ್ರಸನ್ನ ರೇವನ್

ಊರಿನ ಸುತ್ತ ಮುತ್ತ...

ಊರಿನ ಸುತ್ತ ಮುತ್ತ...

ಸಣ್ಣಗೆ ಬೀಸುವ ಗಾಳಿಯೊಳಗೆ
ಅಲ್ಲೊಂದು ಇಲ್ಲೊಂದು ಸಣ್ಣ ಹನಿ
ಹಸಿರು ಬಳಿದುಕೊಂಡ ಹೊಂಗೆ ಮರದ
ನೆರಳಿನಲ್ಲಿ ಸಣ್ಣಗೆ ನರಳುವ ಕವಿತೆಗಳು

ಬಿರು ಬೇಸಿಗೆಯ ಸಂಜೆ
ಅಮ್ಮ ರೊಟ್ಟಿಯಳಗಿಟ್ಟು ಕೊಟ್ಟ
ಕೆಂಪು ಹಿಂಡಿಯೊಳಗೆಷ್ಟು
ತಾಪ, ಸಿಹಿ, ಘಮಲು?
ತಂಪು, ಹಿತ, ಅಮಲು?

ಕಳ್ಳಿ ಬೇಲಿಯ ನಡುವೆ
ಬಟ್ಟಲುಗಣ್ಣಿನ ಮುಂಗುಲಿ
ಅಲ್ಲೇ ಮೇಲಿನ ಜಾಲಿಮರದ
ಎಲೆಯೆಲ್ಲ ಬಾವಲಿ!

-ಪ್ರಸನ್ನ ರೇವನ್