ಹದಿಹರೆಯದವರು

ಭೋರ್ಗರೆವ ತೀರದ ಕಡೆಯಿಂದ 
ಬೀಸುವ ಬೆಚ್ಚಗಿನ ಗಾಳಿಗೆ ಮೆಲ್ಲನೆ ಜಾರುವ
ಮೈಗೆಲ್ಲಾ ಅಂಟಿದ ಪುಡಿಪುಡಿ ಮರಳು

ಇಲ್ಲೇ ಹಿಂದೊಂದು ತಿಳಿಗೊಳದೊಡಲಿನಲಿ
ಆಗಸಕೆ ಮುತ್ತಿಟ್ಟು ಮುಳುಗುವ ಮೀನು
ನೀಲಾಕಾಶದ ದಿಗಂತದಲ್ಲಿ ದಟ್ಟ ಕೆಂಪು!

ಉದ್ದ ಕಿನಾರೆಯ ದೂರದಲ್ಲಿ ಅಲ್ಲೆಲೋ
ಹರಡಿ ಬಿದ್ದ ಜೀನ್ಸು ಟಿ-ಶರ್ಟುಗಳು
ಅಮಲುಗಣ್ಣಿಗೆ ಕಾಣುವ ಪ್ರೇಮ, ದಾಹ, ತವಕ
ಎದೆಯೊಳಗೆ ಮಳ್ಳಗೆ ಕಾಯುವ ಪುಳಕ...
ನಾಗಮಂಡಲ ನೆನಪಿಸುವ ತೆಕ್ಕೆ
ಬಿಸಿಯುಸಿರು, ನೀರವ ಏಕಾಂತ
ಯಾರಿಗೂ ಹೆದರದ, ಕಾಯದ
ಕಾದ ಯೌವ್ವನ!