ನನ್ನವೇ

ನನ್ನವೇ 

ನನ್ನ ಕಣ್ಣೀರುಗಳು ಬಿದ್ದ ಹೊತ್ತಿಗೆ 
ಜಗದಗಲ ಬಿದ್ದ ಎಲ್ಲ ಕಣ್ಣೀರುಗಳೂ ನನ್ನವೇ

ಸಮುದ್ರದಂತೆ ಉಕ್ಕಿದ ನನ್ನ ನಗುವಿನ ಹೊತ್ತಿನಲ್ಲಿ
ಹೂವಿನಂತೆ ಅರಳಿದ ನಗುಮೊಗಗಳೆಲ್ಲ ನನ್ನವೇ

ನಾನು ಬಿಗಿದಪ್ಪಿ ನಿಟ್ಟುಸಿರೆಳೆದ ಘಳಿಗೆಯಲ್ಲಿನ
ಎಲ್ಲ ಅಪ್ಪುಗೆಗಳ ಎದೆ ಮಿಡಿತ, ಕಾವು ನನ್ನವೇ

ಸೀಳುವ ಮಾತುಗಳ, ಹಸಿವು, ಕಾದಾಟ, ಒಂಟಿತನದ
ಭೀತಿ ಸುರಿದಾಗ ಕುಗ್ಗಿದ ಸುಡು ಮನಸುಗಳೆಲ್ಲ ನನ್ನವೇ

ಎಲ್ಲ ತತ್ವ, ಚಳುವಳಿ, ಧರ್ಮ, ಅನುಬಂಧಗಳ
ಸಹವಾಸ ಒಲ್ಲದ ಅರಿಮೆಯ ಹೊರೆ ಇಳಿಸುವ
ನಿಯಮಗಳ ಮುರಿವ, ಸಿರಿವಂತರ ಸಿನಿಕತೆಯ ಜರಿವ
ಅಮಾಯಕ ಪ್ರೇಮಕ್ಕೆ ಹಾತೊರೆಯುವ
ಸಕಲ ಜೀವ ಸಂಗಾತಿಗಳ ಕ್ರಾಂತಿ ಕನಸುವ 
ನೋವು ನಲಿವು ಅನುಭಾವವೂ ನನ್ನವೇ! 

ಪ್ರಸನ್ನ

ಒಂದು ಹಾಡಿನ ಕ್ರೌರ್ಯ 

ಸಂಗೀತ, ಮಾಧುರ್ಯ, ಕವಿತೆ ಇರಿಯಬಲ್ಲವು
ಚುಚ್ಚಬಲ್ಲವು, ಮತ್ತೆ ಮತ್ತೆ ಹಣಿಯಬಲ್ಲವು

ನೆನಪಿನ ಎದೆಗೂಡಿನಲ್ಲಿ ನುಸುಳಿ
ಕಾಪಿಟ್ಟಿದ್ದ ಸಣ್ಣ ನೆನಪಿನ ಕುಡಿಗೆಗಳನ್ನು
ಧ್ವಂಸಮಾಡಿಬಿಡಬಲ್ಲವು

ಒಂದು ಮಧುರ ಹಾಡಿನ ಕ್ರೌರ್ಯ 
ನಿರ್ದಯಿಯಾದುದು, ಯಾವುದೋ
ಕಾಲಕ್ಕೆ ಎಳೆದೊಯ್ದು ಅಂದೆಂದೋ ಹತ್ತಿದ್ದ
ಕುಣಿಕೆಗೆ, ಶಿಲುಬೆಗೆ ಮತ್ತೆ ಏರಿಸಿಬಿಡಬಲ್ಲವು

ಒಂದು ಹಾಡಿನ ಸಾಲು ಮಹಾಶತ್ರು
ಕಿತ್ತುಹೋದ ಕೊಡವೆ, ಚಾಟಿಗಳನ್ನು
ಮತ್ತೆ ಹೊಸೆದು ಬಾರಿಸಬಲ್ಲದು, ಎಂದೋ ಸತ್ತ
ಸಂಬಂಧಗಳನ್ನು ಮತ್ತೆ ಬದುಕಿಸಿ, ನೆನಪಿಸಿ, 
ನಿಮ್ಮೆದುರಿಗೆ ನಿಲ್ಲಿಸಿ ಬೆದರಿಸಬಲ್ಲವು

ಹೂವು, ಜೇನು, ಇಬ್ಬನಿ, ಆರ್ದ್ರತೆ, ಹಾಡು, ಹಸೆ,
ಅಕ್ಷರ, ಕನಸು, ಮನಸು ಎಲ್ಲವೂ ಕ್ರೂರಿಗಳೇ,
ನೀನು ಅಲ್ಲೆಲ್ಲೋ ಮೈಮರೆತಾಗ,
ಮಾಯದಿಂದ ಎದೆಯ ಒಳಗೋಣೆಯಲಿ ನುಸುಳಿ
ವಿಪ್ಲವವನ್ನೆಬ್ಬಿಸಿ ಇಂಥ ನೋವಿಗದ್ದಿದ ಸಾಲುಗಳನ್ನು 
ಗೀಚಿಸಿಬಿಡುತ್ತವೆ. ಈ ಹಾಡುಗಳ ಕ್ರೌರ್ಯ ಅವರ್ಣನೀಯ

-ಪ್ರಸನ್ನ
 

ಇಂದಿನ ಈ ರಾತ್ರಿ

ಪರ್ಷಿಯನ್ ಕವಿ ಹುಷಾಂಗ್ ಎಬ್ತೆಹಾಜರ ಕವಿತೆ 

Tonight at night ನ ನನ್ನ ಭಾವಾನುವಾದ 

ಈ ಸರಿರಾತ್ರಿ

ಈ ನಡುರಾತ್ರಿ ನನ್ನ ಹೃದಯದ ಮಾತೊಂದ ಕೇಳು

ನಾಳೆಯೇ ಹಳೆ ಮಾತಿನಂತೆ ಮರೆತೇ ಬಿಡು

ಈ ನನ್ನ ಬಾಹುಗಳಲ್ಲಿ ಬಂಧಿಸಲಾಗದ... 

ಹುಣ್ಣಿಮೆಯ ಬೆಳದಿಂಗಳಿನಂತ ನೀನು ಯಾರ ಕೈ ಸೇರುವೆ?

ಯಾವುದದು ನಿನ್ನೊಳಗಿಂದ ಉಕ್ಕುವ ಅಮಲು? 

ಮೊದಲ ಗುಟುಕಿಗೆ ಶಾಂತಿ ಮತ್ತೆ ಮಹಾ ಕುಡುಕನ ಕುಡಿತ ಮೀರಿಸುವ ನಶೆ  

ಹೆಂಡ ಕುದಿಯುತ್ತಿದೆ ಎದೆಯೊಳಗೆ, ಬಾ ಇಣುಕು 

ನೀನು ಕೇಳುವೆಯಾದರೆ, ನಿನ್ನ ರತ್ನದ ಕಿವಿಯೋಲೆಗಿಂತ 

ಚಂದದ ಮಾತೊಂದ ಹೇಳುವೆ 

ಈ ಜಗತ್ತಿನ ಬಟ್ಟಲು ಪ್ರೇಮಿಗಳ ಹೃದಯದ ರಕ್ತದಿಂದ ತುಂಬಿದೆ

ಅದನ್ನು ಹೀರಿದರೆ ಸ್ವಲ್ಪ ಗೌರವವಿರಲಿ 

ನೆರಳೇ, ದೀಪದಂತೆ ಜ್ವಾಲೆಯಂತೆ ನೀನೂ ಹಬ್ಬಿಸುವೆ

ನಿನ್ನ ಮೌನ ಕಚ್ಚಿದ ತುಟಿ ಹರಡಿಸುವ ಕತೆಗಳನ್ನು!  

ಮೂಲ: ಹುಷಾಂಗ್ ಎಬ್ತೆಹಾಜ್ 

ಕನ್ನಡಕ್ಕೆ: ಪ್ರಸನ್ನ ರೇವನ್

Tonight - Tonight at night

Tonight you listen to the story of my heart,
Tomorrow you will forget me like a story.
I can't hold you in my arms,
Oh moon, with whom do you hold hands?
What is in your soul that with the first sip,
You make both the sober and the drunken drunkards drunk.
Wine is boiling in my heart, come and see,
If you remember from the blood of Siyavush.
If you listen, I will tell you a kind word,
Better than the jewel that you put in your ear.
The cup of the world is full of the blood of lovers' hearts,
Keep your respect, if you drink.
Shadow, like a candle, you spread a flame to the crowd,
From these stories that you tell with silent lips.

-Hushang Ebtehaj

ಯಾರ ಹಂಗೂ ಇರದ

ಯಾರ ಹಂಗೂ ಇರದ

ಯಾರ ಸಿದ್ಧ ಸೂತ್ರಕ್ಕೂ ಬಗ್ಗದ ಯಾವ ಜಾತಿಧರ್ಮದ ಸೋಂಕೂ ಬರದ ರಾಗ, ದ್ವೇಷ, ವಿಷಾದ ರಹಿತ ಸ್ವಚ್ಚ ಆಕಾಶದ ಸಿಸುಗೂಸು ನಾನು, ನೀಲ ವಿಸ್ತರದ ಪಾರಾವಾರದ ದಿನಮಣಿಯೂ… ಮರಳ ಕಣವೂ ನಾನು…

ಯೂಸ್ಲೆಸ್ ಕವಿತೆ

ಬೆಟ್ಟದಲ್ಲಿ ಕಳೆದು ಹೋದ 

ಕೆಂಪು ಹೂವ ಘಮಲು 

ಕೈಜಾರಿ ಠಳ್ಳನೆ ಬಿದ್ದ  

ಕಡುವೈನಿನ ಚಿತ್ತಾರದ ಅಮಲು 

ಚಂದ್ರ ಕಳೆದ ಬತ್ತಲೆ ರಾತ್ರಿ

ಸುರಿಸಿದ ಉಲ್ಕೆಗಳ ಬಣ್ಣ ಸಾವಿರ

ತಂಗಾಳಿಗೆ ಮೈಯ್ಯೊಡ್ಡಿದ 

ಕಂಗಳ ಹಸಿವಿನ ಕಾತರ 

ಸಾಯುತ್ತಲೇ ಉರಿಯುತ್ತಿದೆ

ತಿಳಿಹಳದಿಯ ಮುಂಬತ್ತಿ 

ಕುಣಿ ಕುಣಿಯುತ್ತಿದೆ 

ಹೂದಾನಿಯ ನೆರಳು ಕೈಯ್ಯೆತ್ತಿ 

ಕತ್ತಲ ದಿಟ್ಟಿಸುತ್ತಲೆ ಕಾಣುವ

ಕನಸುಗಳಲ್ಲೆಷ್ಟು ವ್ಯರ್ಥ? 

ಪರದೆಯ ಮೇಲೆ ಮೂಡಿ ಮಡಿಯುವ 

ಈ ನುಡಿಗಳಿಗಿದೆಯೆ ಅರ್ಥ? 

ಪ್ರಸನ್ನ 

ಅಮೇರಿಕೆ

ಅಮೆರಿಕೆ 

ತುತ್ತಿಕ್ಕಿ ಉಣಿಸುತ್ತಲೇ ಕಹಿರೊಟ್ಟಿಯ
ಗಂಟಲಿಗೆ ನೆಟ್ಟಳು ತನ್ನ ಹುಲಿ ದವಡೆಯ
ಹೀರುತ್ತಲೇ ನನ್ನ ಜೀವದ ಉಸಿರ, ಆದರೂ ಕೇಳಿ 
ಪ್ರೇಮಿಸುವೆ ನನ್ನ ಹರೆಯ ಪರೀಕ್ಷಿಸಿದ ಈ ಸುಂದರ ನರಕವ
ನನ್ನ ಬಿಸಿರಕ್ತಕೆ ಹರಿವಾಗಿ ನುಗ್ಗಿದೆ ಅವಳದೇ ಕಸುವು
ಅವಳ ಮೇಲಿನ ನನ್ನ ಹಗೆತನಕ್ಕೆ ಅದೇ ಬಲವು  
ಮತ್ತೆ ಮತ್ತೆ ಸೊಕ್ಕಿದ ಹೊಳೆಯಂತೆ ನುಂಗುವಳು ನನ್ನತನವ
ಆದರೂ, ರಾಜನ ಕಾಲಡಿ ನಿಂತ ಕ್ರಾಂತಿಕಾರಿಯ ರೀತಿ 
ನಿಲ್ಲುವೆ ಅವಳ ಗೋಡೆಗಳ ನಡುವೆ ಕೊಂಚವೂ ಇಲ್ಲದೆ ಭೀತಿ,
ಅಂಜಿಕೆ, ದುಃಖ, ಪಿಸುಮಾತಿನ ಅಳುಕು
ಎದುರಿನ ದಿನಗಳ ನೋಟದಲಿ ಇಲ್ಲವೇ ಇಲ್ಲ ಬೆಳಕು
ಕಂಡಷ್ಟೂ ಅವಳದೇ ಬಲ, ಮಹಾ ಪರ್ವತದ ಬೆರಗು
ಅವಿತಿದೆ ಎಲ್ಲವೂ ಕಾಲನ ಗುರಿತಪ್ಪದ ಕೈ ಬೀಸಿನ ಕೆಳಗೆ
ಮುಳುಗುವಂತೆ ಸಿರಿಹೊನ್ನು ಉಸುಕಿನ ಒಳಗೆ.

ಕ್ಲಾಡ್ ಮೆಕೆ

ಕನ್ನಡಕ್ಕೆ: ಪ್ರಸನ್ನ 

America
BY CLAUDE MCKAY

Although she feeds me bread of bitterness,
And sinks into my throat her tiger’s tooth,
Stealing my breath of life, I will confess
I love this cultured hell that tests my youth.
Her vigor flows like tides into my blood,
Giving me strength erect against her hate,
Her bigness sweeps my being like a flood.
Yet, as a rebel fronts a king in state,
I stand within her walls with not a shred
Of terror, malice, not a word of jeer.
Darkly I gaze into the days ahead,
And see her might and granite wonders there,
Beneath the touch of Time’s unerring hand,
Like priceless treasures sinking in the sand.

ಒಲವು ಮತ್ತು ಕಾಲ

ತಟಕ್ಕನೆ ಬಿದ್ದ ಸಣ್ಣ ಮಳೆಹನಿಯೊಂದು ಹಸಿರೆಲೆಯ ನಡುವೆ ಗೆರೆಯಾಗಿ ಹರಿದು

ಬೆಟ್ಟದ ಹಣೆಯ ಮೇಲೆ ಒತ್ತಿನಿಂತ ಮರಗಳ

ನಡುವೆ ಹಸಿ ಮೋಡಗಳು ಜಾರಿ ಮರದ ರೆಂಬೆಯನ್ನು ಅಪ್ಪಿದರೂ ತಳಕೊಂಬೆಗೆ

ಹುದುವಿನೊಳಗೆ ಸೀತಾಳೆಬಳ್ಳಿಯ ಬೇರಿನ ಮುತ್ತು

ಮುಟ್ಟಲಾಗದ ಬೈಗುಗೆಂಪಿನಲ್ಲಿ ಅಡಗಿರುವ

ಬಣ್ಣಗಳ ಓಕುಳಿ ಚೆಲ್ಲಿದ ಎದೆ ಗೂಡು

ಮರಳ ಕಣಕ್ಕೆ ದಿನವೂ ಮುತ್ತಿಟ್ಟು

ಮುತ್ತಾಗಿಸುವ ಚಿಪ್ಪಿನೊಳಗಿನ ಜೀವದ ಕನಸು

ಬೆಳಕಿನ ನಿರೀಕ್ಷೆಯಿಂದ ನೆಲದಡಿಯ

ಕತ್ತಲಿನಲ್ಲಿ ಮೊಳೆಯುವ ಬೀಜದ ಕಾತರ

ಎಂದೋ ಹುಟ್ಟುವ ಮಗುವಿಗಾಗಿ

ಹಂಬಲಿಸುವ ತಾಯ ಮೊಲೆಗಳು

ಕಾಲವನ್ನು ಮೆಟ್ಟಿ ನಿಲ್ಲಲು ಒಲವಿಗಲ್ಲದೇ

ಮತ್ಯಾರಿಗೆ ಸಾಧ್ಯ?

- ಪ್ರಸನ್ನ ರೇವನ್

ಎದೆ ಮೋಡಗಳ ಗುಡುಗು

ಎದೆ ಮೋಡಗಳ ಗುಡುಗು 

ಭುವಿಯೆದೆಯಲಿ ಇನ ಜಾರಿದ 

ದಿಕ್ಕಂಚಿನಲಿ ಚದುರಾಡಿದೆ ಮಿಂಚು,

ಉತ್ಕಟತೆಯ ಬಿಸು ಬಿರುಗಾಳಿಗೆ 

ನುಸುಳಾಡುವ ತೋಳುಗಳ ಸಂಚು!

ಮೆತ್ತನೆಯ ಹಿಮದೊದಿಕೆಯಲಿ 

ಹರಿದಾಡಿದೆ ತಿದಿಯುಸಿರಿನ ಮೊರೆತ, 

ಧರಧುರದ ಬರಸಿಡಿಲಿನ ಉರಿಜ್ವಾಲೆಯಲಿ

ನುಸುಳಾಡುವ ಫಣಿಮಂಡಲದ ಹೊಸೆತ!

ಸುಳಿದಾಡುವ ಮುಂಗುರುಳಿನ ಹಂದರದಿ 

ಬೆಸೆದೆದೆಗಳ ಬಿಸಿಯುಸಿರಿನ ಕಾದಾಟ

ಹಸಿದೊಲವಿನ ಉನ್ಮಾದಕೆ 

ಆಲಿಂಗನದ ಮಾಟ! 

ಎದೆಯೊಳಗಿನ ಉರಿಬಿಸಿಲಿಗೆ 

ಬಿಸಿ ಬೆಸುಗೆಯೇ ತಂಪು 

ಸುರಿಸುರಿಯುವ ಹಿಮದೊಳಗೆ

ಬೆವರಿನ ಹೊಳೆ ಕಂಪು!

- ಪ್ರಸನ್ನ 

ಅಮ್ಮ

ಅಮ್ಮ...

ಸಂಭವಿಸಿದೆ ಕಡುಹಳದಿಯ 

ಆಗಸದಲಿ ರವಿಯುದಿಸಿದದಂತೆ

ಆ ಕೊನೆಮುಟ್ಟದ ಆಗಸ 

ನೀನಲ್ಲವೇನು? 

ತಿರುತಿರುಗಿ ನಿಂತೆ ನೀಲಿಕಡಲ

ದೂರ ತೀರವ ತಲುಪಿದ ಚಿಪ್ಪಿನಂತೆ

ಪಾರಾವಾರವ ಬಳಸಿದ ದಡ 

ನೀನಲ್ಲವೇನು? 

ಜಯಿಸಿ ಬಂದೆ ಕರಿ ಮತಂಗದೆತ್ತರದ

ಪುಸ್ತಕವನುಂಡ ಸಾರಸ್ವತನಂತೆ 

ಎಡವಿದೊಡೆ ಮಸ್ತಕದಿ ಹೊಳೆವ ಪದ 

ನೀನಲ್ಲವೇನು? 

ಅಪ್ಪನೆನೆಸಿಕೊಂಡೆ ಕೆಂಗೆನ್ನೆಯ

ಮುಗುದೆಯರ ಸವಿಮಾತಿನಂತೆ 

ಆ ಎಳೆಪಾದಗಳು ನನ್ನೆದೆಯಲಿ ಮೂಡಿಸಿದ ಅಚ್ಚು 

ನೀನಲ್ಲವೇನು? 

ಯಾರೂ ಹೇಳಿಕೊಡದ ಮೊದಲ ಪದ

ಕೊನೆಯುಸಿರವರೆಗೂ ಮರೆಯದ ಪದ್ಯ 

ನೀನಲ್ಲವೇನು? 

- ಪ್ರಸನ್ನ 

ಎದುರಿಗೆ ಕಂಡವಳ ಕವಿತೆ

ಎದುರಿಗೆ ಕಂಡವಳ ಕವಿತೆ

ಪೇಲವ ಮೋಡಗಳ ಅಂಚಿಂದ ಜಾರಿದ
ಬೆಚ್ಚನೆ ನೆಲದ ಮಡಿಲನ್ನು ಕನಸಿದ
ಆ ಹಿಮದ ಹನಿ ಕೊನೆಗೂ ಮುತ್ತಿಟ್ಟಿತು
ಅವಳ ಕಂಗಳ ತುದಿಯ ಕಾಡಿಗೆ ತಟ್ಟನೆ ತೊಟ್ಟಿಕ್ಕಿತು

ರೆಪ್ಪೆಗಳ ನಿಧಾನದ ಅಪ್ಪುಗೆಯಲ್ಲಿ
ಹಿಂಡುವುದು ಯಾತನೆ ಕಣ್ಣಲ್ಲಿ
ಇಳಿಯುತ್ತಿದ್ದ ಸೂರ್ಯ ದಿಗಂತದೊಳಗೆ
ಜಾರುತ್ತಿತ್ತು ಕೆಂಡದ ಕಡ್ಡಿ ಬೆರಳೆಡೆಗೆ

ಕಾರಣವಿಲ್ಲದೆ ಏರುವ ಎದೆಬಡಿತ
ಕಾಣದ ಹಾದಿಗಳ ಹುಡುಕುವ ತುಡಿತ
ಪ್ರೇಮ ಮರೆತ ಮುಖದಲ್ಲಿ
ಭಾವನೆಗಳ ಹೊಯ್ದಾಟ? 


ಮೂಡದ ಚಿತ್ರವ ಅಡಗಿಸಿಕೊಂಡು
ಗಹಗಹಿಸಿ ಕೆರಳಿಸುವ ಹಾಳೆ,
ಕಾಲದ ಕಣ್ಣ ತಪ್ಪಿಸಿದ ಪ್ರೀತಿಯ ಆಳ,
ತೀರದ ಬಯಕೆಗಳ ಚಾದರದ ಕಪ್ಪಿನಲಿ
ಕನಸಿನ ಬಣ್ಣಗಳ ಬೆಳಕಿನಾಟ
ಇದು ಎದುರಿಗೆ ಕಂಡವಳ ಕವಿತೆ
ಅವಳು ಮತ್ತೆ ಕಾಣದಿರಲಿ

ಪ್ರಸನ್ನ

ಒಂದು ಮಧ್ಯಾಹ್ನ

ಎದೆಯ ಹಾಸಿಗೆಗೆ ಒರಗಿ
ಉಸಿರಿನ ಏರಿಳಿತಗಳಲ್ಲಿ ತಾನಾಗಿ
ಗುಂಡಿಗೆಯ ನಾದದಲ್ಲಿ ಒಂದಾಗಿ
ಅಪ್ಪಿ ಜಾರಿದಳು ಸ್ವಪ್ನಲೋಕದಲಿ

ಕನಲುವಳು ಕನಸಿನ ಮೆಲುಕಿಗೆ,
ಮತ್ತೆ ಮತ್ತೆ ಬಿಗಿಯುವ ಅಪ್ಪುಗೆಗೆ,
ಏನು ಹೇಳಲಿ ಕಡುಗಪ್ಪಿನ
ನಿದ್ದೆಯಲ್ಲೂ ಮಿಂಚುವ ನಗುವಿಗೆ?

ಕಪ್ಪು ಕೂದಲ ಇರುಳಿನಲಿ
ಮಿನುಗುವಳು ತನ್ನಾಕಾಶದಲಿ
ಹೊಳೆವ ರೆಪ್ಪೆಗಳಾಡಿಸುತ
ನಿಟ್ಟನೆ ಸುಯ್ಯುವಳು ಬಿಸಿಯುಸಿರ ತಾಳದಲಿ

ದೂರವಿರುವ ನನ್ನಮ್ಮನ ಒಲುಮೆಯ
ಮಡಿಲಿನಲ್ಲಿ ಒರಗಿಹುದು ನನ್ನ ಮನ
ಅವಳ ಉಸಿರಿಗೆ ತಾಳವಾಗಿ ನನ್ನುಸಿರು,
ದೇಶಕಾಲಗಳ ದಾಟಿ ಮಿಡಿಯುವ ಕರುಳಬಳ್ಳಿ

ನನ್ನ ಮಡಿಲಿಗೆ ಒರಗಿರುವ ಇವಳೂ ನನ್ನಮ್ಮನಲ್ಲವೇ?
ತಾಯಲ್ಲದ ಹೆಣ್ಣಿಲ್ಲದಂತೆ ಹೆಣ್ಣೆಲ್ಲವೂ ಹೊನ್ನಲ್ಲವೇ?

-ಪ್ರಸನ್ನ

ನನಗೇನು ಬೇಕು?

ನನಗೇನು ಬೇಕು?

ನನಗೆ ಬೇಕು, ಬಿರು ಬೇಸಗೆ ಸಂಜೆಗಳ ತಂಪುಗಾಳಿ
ಅಟ್ಟದ ಮೇಲಿಟ್ಟ ಬಾಳೆಗೊನೆಗಳ, ಬೆಲ್ಲದ ಅಚ್ಚುಗಳ ಕಮಟು ನಾತ
ಕಾಡು ಹಾದಿಯ ಚಿಕ್ಕ ಜಲಪಾತದ ಸಣ್ಣ ಮೊರೆತ
ಕಣ್ಣ ಮುಂದೆ ಗಕ್ಕನೆ ಸುಳಿವ ಕೆಂಪು ಏರೋಪ್ಲೇನ್ ಚಿಟ್ಟೆ

ಮಳೆನಿಂತರೂ ನಿಲ್ಲದ ಹಂಚಿನ ತುದಿಯ ಹನಿಗಳು
ಮುಗಿಲೆತ್ತರಕೆ ಹಬ್ಬಿದ ಮರದಡಿಯ ಪುಟ್ಟ ಆಡಿನಮರಿಯ ಕೇಕೆ
ಚಳಿಗಾಲದ ಕತ್ತಲಿನ ಸಂಜೆಗಳ ಬೆಚ್ಚಗಿನ ಗಂಜಿ, ಹುರಿದ ಮೀನು
ಬಾವಿಯೊಳಗಿನ ಮರಿ ಆಮೆಯ ದಿಟ್ಟ ನೋಟ

ಉಜ್ವಲ ವರ್ಣಗಳ ಹಕ್ಕಿಗಳ ಸುಳಿದಾಟ, ಮರೆದಲೆಗಳ ಹೊಯ್ದಾಟ
ವ್ಯೋಮದಾಚೆಯ ನಕ್ಷತ್ರ ಪುಂಜಗಳ ದಿಟ್ಟಿಸುವ ಸರಿರಾತ್ರಿಯ ಮೌನ
ಪ್ರೀತಿಸುವವರ ಸಾನಿಧ್ಯ, ಕಣ್ಣುಮುಚ್ಚಿ ಅತ್ತುಬಿಡುವ ಗೆಳೆತನ
ಭೂಮಿಯನ್ನು ಸೀಳಿ ಎದ್ದುನಿಲ್ಲುವ ಚಿಗುರಿನ ಪಾಠ

ನನಗೆ ಯಾವಾಗಲೂ ಬೇಕು ಈ ಪುಟ್ಟ ಬೇಕುಗಳನ್ನು
ಕನಸಿಸುವ ಮುಗ್ಧತೆ, ಸ್ವಲ್ಪ ದಡ್ಡತನ ಮತ್ತು ಬಹಳ ಹಸಿವು

-ಪ್ರಸನ್ನ ರೇವನ್

ಶ್ಲೋಕತ್ವ ಮಾಗತಃ

ನಟ್ಟಿರುಳಿನ ಕಗ್ಗತ್ತಲ
ನೀರವ ಮೌನದ ಗೆಳೆತನ,
ನನ್ನತನದ ನೋವು ನನ್ನೊಳಗೆ
ಮಿಣುಕುವ ಪುಟ್ಟ ದೀಪ

ನೆರಳ ಕೈ ಹಿಡಿದು ನೆಡೆದು
ಎಡವಿ ನೆರಳಾಗಿ ಬಿಡುವ ಹಂಬಲ,
ಮಳೆನಿಂತು ಹೊತ್ತಾದರೂ
ತೊಟ್ಟಿಕ್ಕುವ ಹೆಂಚಿನ ತುದಿ

ನಾನೇನೇ ಆದರೂ ನಾನಾಗದ
ಅದೆಷ್ಟು ಅನುಭವಗಳು?
ಸುತ್ತಲಿನ ಪ್ರಪಂಚದ ತುಂಬ
ಮುಗಿಯದ ಹಾಡುಗಳೆಷ್ಟು?

ಬದಲಾಗುವ ಬೆಳಕಿನ
ಜಗತ್ತಿನಲ್ಲಿ ಬದಲಾಗುತ್ತಲೇ
ಬೆತ್ತಲಾಗುವ ಮೈಮನಗಳ,
ಒಳಸುಳಿಗಳ ಅಮಾಯಕತೆ
ನನ್ನ ನಿಜವಾದ ಆಸ್ತಿ, ಅಥವಾ ಅಸ್ತಿ...

-ಪ್ರಸನ್ನ

ಮುಗುದೆ

ಚಾಚಿದ ಹವಳದ ಬೆರಳುಗಳು
ಗಾಳಿಗೆ ಒದೆಯುವ ಎಳೆ ಸಂಪಿಗೆಯ ಪಾದ
ಹೊಳೆಯುವ ಕಪ್ಪು ರಾತ್ರಿಯಂಥ ಕಣ್ಣುಗಳಿಂದ
ಇಣುಕಿದ್ದು ಬೆಳದಿಂಗಳಿನ ಆಪ್ತತೆ

ದಿಗಂತದ ಬೊಟ್ಟಿನಂತ ದಿಟ್ಟ ನೋಟ
ಮಲ್ಲಿಗೆಯ ದಂಡೆಯಂಥಾ
ಹಾತೊರೆಯುವ ಬಾಹುಗಳು
ಜೇನಿನ ಕೆನ್ನೆಗಳಿಂದ ಜಾರಿ ಬಂದ
ಪುಟ್ಟ ಕೇಕೆ ಕಿವಿಗೆ ಸಿಹಿ ಸುರಿದಂತೆ

ತಾವರೆ ಎಸಳಿನಂಥ ತುಟಿಗಳಿಂದ
ಚಾಚಿದ ಮುಗ್ಧ ನಗುವ ಕಂಡ ಕಣ್ಣು
ಕಾಣುವ ಕನಸೆಲ್ಲವೂ ಗುಲಾಬಿಯೇ!
ಆ ನನಸಾದ ಕನಸಿನ ಹೆಸರೇ ಸನ್ಮಯ!

-ಪ್ರಸನ್ನ

ಯಾಕೆ?

ಹೊರಗೆ ಭರ್ರನೆ ಸುರಿಯುತ್ತಿರುವ ಮಳೆ,
ಒಳಗೆ ಸಿಡಿಯುವ ಗುಡುಗು ಮಿಂಚು
ನಿನ್ನ ಮೆದು ತುಟಿ ಮತ್ತು ಪಾದಗಳ ಅಚ್ಚು,
ನನ್ನ ಎದೆಯ ಮೇಲೆ ಇನ್ನೂ ಹಾಗೆಯೇ ಇವೆ.


ದೇಶ ಕಾಲಗಳು ನುಗ್ಗುವ ರೈಲಿನಂತೆ ಸರಿದರೂ
ನಿರಂತರವಾಗಿ ಜೀಕುವ ಜೋಕಾಲಿಯಂತೆ
ಕನಸು, ನೋವು, ದುಗುಡ, ಮೌನದೊಳಗಿಂದ
ಆಗಾಗ ಇಣುಕುವ ನಿನ್ನಿಂದ ದೂರ ಹೇಗೆ ಸಾಧ್ಯ?

ಸುಟ್ಟ ಹೃದಯ ಬೆಂಕಿಯನ್ನು ಪ್ರೀತಿಸುವಂತೆ
ಕಣ್ಣೀರಿನಲ್ಲೂ, ಕಾಡಿನಲ್ಲೂ, ಕತ್ತಲಲ್ಲೂ, ಕಡೆಗೆ
ಕನಸಿನಲ್ಲೂ ನನ್ನನ್ನು ಒಂಟಿಯಾಗಿ ಬಿಡದ ನೀನು
ನನ್ನನ್ನು ಅಗಲಿದ್ದಾದರೂ ಯಾಕೆ?

-ಪ್ರಸನ್ನ

ಬೇಸಗೆಯ ರಾತ್ರಿಗಳು

ಬೇಸಗೆಯ ರಾತ್ರಿಗಳು
ಬೇಸರದ ಕನಸುಗಳು
ಬೀಸದ ಗಾಳಿಗೆ ಅಲುಗದ ಎಲೆಗಳು
ಮುಚ್ಚಿಟ್ಟ ಮಾತುಗಳ
ಬಚ್ಚಿಟ್ಟ ಆಸೆಗಳ
ಬಿಚ್ಚಿ ನೋಡದ ಮನಸಿನೊಳಗಿನ
ಬೆಚ್ಚನೆಯ ಹರೆಯವ 
ಕುಚ್ಚುವ ಬೆಳದಿಂಗಳ
ದಿಟ್ಟಿಸುವ ಕಣ್ಣುಗಳೊಳಗೆ
ಭುಗಿಲೆದ್ದು ಉರಿಯುವ
ಬುಸುಗುಡುವ ರಾತ್ರಿಗಳು

-ಪ್ರಸನ್ನ ರೇವನ್

ದಾವಣಗೆರೆ ಎಂದರೆ

ದಾವಣಗೆರೆ ಎಂದರೆ

ಮಲೆನಾಡು ಬಯಲುಸೀಮೆ ಉತ್ತರ ದಕ್ಷಿಣ
ಕರ್ಣಾಟದ ಹಗ್ಗ ಜಗ್ಗಾಟಗಳ ಮಧ್ಯೆ
ಘನವಾಗಿ ನಿಂತ ಬಯಲು

ಮಿಲ್ಲುಗಳ, ಕಾರ್ಮಿಕರ
ಕಾಮ್ರೇಡುಗಳ ಕೆಂಪುಧ್ವಜಗಳನ್ನು
ಮಾಲೀಕರ ಕಾಲ್ತುಳಿತವನ್ನೂ
ಒಡಲಲ್ಲಿ ಹಾಕಿ ನಿಂತ ಸಾಕ್ಷಿಪ್ರಜ್ಞೆ

ತಾಯಿ ದುಗ್ಗವ್ವನ ಮುಂದೆ
ಚೆಂಡಾಡಿದ ಕುರಿ ಕೋಣಗಳ ತಲೆ,
ಸುರಿದ ಕೋಡಿ ರಕ್ತ ತೊರೆಗಳು
ನರನಾಡಿಯಂತೆ ಹರಿದ
ಬೀದಿಗಳ ಸಾಲು

ಮಳೆ ಹನಿಯದಿದ್ದಾಗ ಬಸವಳಿದ ಜನ
ಅದೇ ತಾಯಿ ದುಗ್ಗವ್ವನ ಮುಂದೆ ಸಂತೆ ನೆರೆದು
ದೈವಕ್ಕೇ ಪ್ರತಿಭಟಿಸಲು ಹಿಮ್ಮೆಟ್ಟದ
ಮುಗ್ಧ ಮಾನಸರ ತವರು 

ಹೊಯ್ಸಳ ನಾಯಕ, ಹೈದರಾದಿಯಾಗಿ
ಮರಾಠರು ಆಳಿದರೂ ಕನ್ನಡದ ಕೈ ಬಿಡದ
ಲಕ್ಷ್ಮಿಯಾಳುವ ಸರಸ್ವತಿ ಕಾಣುವ 
ವಿದ್ಯೆಯ ಚಿಮ್ಮಿಸುವ ಆಗ್ರಹದ ಅಗ್ರಹಾರ

ಹಳೆಪೇಟೆ, ಹೊಸ ಪೇಟೆಗಳೆನ್ನದೇ
ಎಲ್ಲರಿಗೂ ಮಂಡೀಪೇಟೆಯ
ರುಚಿ ತೋರಿಸಿದರೂ ದಾನಕ್ಕೆ
ಚೆಲ್ಲಿದ ರೊಕ್ಕದ ಲೆಕ್ಕ ಇಡದ ಮಂದಿ


ವಿರಕ್ತರಿಗೆ ವೈರಾಗ್ಯವನ್ನೂ
ವೀರರಿಗೆ ಕಿರೀಟ ಪಲ್ಲಕ್ಕಿಯನ್ನೂ
ಬಸವನ ಹಾದಿ ಹಿಡಿದವರಿಗೆ
ದಾಸೋಹವನ್ನಿತ್ತ ವಣಿಕರೂರು 

ಪಟ್ಟಣವಾಗಿ ಬೆಳೆದರೂ ಗ್ರಾಮ್ಯ
ಆಚರಣೆಗಳನ್ನು ಬಿಡದ, ಶಿವರಾತ್ರಿ ನವರಾತ್ರಿ,
ಪಂಚಮಿ, ಹಟ್ಟಿ, ಮಹೇಶ್ವರ, ಬಕ್ಕೇಶ್ವರ ಎಲ್ಲ
ಹಬ್ಬಗಳನ್ನೂ ಸಾಲಮಾಡಿಯಾದರೂ
ಸಂಭ್ರಮಿಸುವ ಜನ

ಬೆಳ್ಳುಳ್ಳಿ ಖಾರ ನರ್ಗಿಸ್ ಮಂಡಕ್ಕಿ
ಮಿರ್ಚಿ, ಉದ್ದಿನೊಡೆ, ಗುಳಾಡಿಕೆ ಉಂಡಿ,
ಓಪನ್ ಖಾಲಿ ಬೆಣ್ಣೆದೋಸೆ, ಉಸುಲು, ಸೂಸಲು
ಮೆಲ್ಲುತ್ತಲೇ ಎಲ್ಲ ಮರೆಯುವ ರಸಿಕರೂರು

ಬಾಯಿಂದ ಮಾತಿನ ತಾಂಬೂಲ ಉಗಿದರೂ
ಹೆಗಲ ಮೇಲೆ ಕೈಹಾಕಿ ಸ್ವಾಗತಿಸುವ
ವಿಶೇಷ ಬೈಗುಳಗಳಲ್ಲಿ ದೇಶಕ್ಕೇ ಮೊದಲು
ನಿಲ್ಲಬಹುದಾದ ಸೃಜನಶೀಲ ಜನಪದ

ಸರ್ಪದಹುಣ್ಣಿಗೆ ಗರುಡನ ಚಿತ್ರ
ಹೊಟ್ಟೆ ನೋವಿಗೆ ಅರಿಶಿನಕೊಂಬಿನ ಚುಟುಕು
ಭಟ್ಟಿ ಬಿದ್ದದ್ದಕ್ಕೆ ಕಾಲು ನೀವಿದ ನಾಟಿವೈದ್ಯರಳಿದು
ದೇಶಕ್ಕೇ ಅಲೋಪತಿ ಡಾಕ್ಟರುಗಳನ್ನು
ಸಪ್ಲೈ ಮಾಡುವ ವಿದ್ಯಾಕ್ಷೇತ್ರ

ನಾಟಕ ಕಂಪನಿಗಳು ಹುಲುಸಾಗಿ ಬೆಳೆದ
ಅಭಿಯಂತರರಿಗೂ ರಂಗದ ರುಚಿ ಹತ್ತಿಸಿದ
ಕುಸ್ತಿ ಚಿತ್ರ ಸಂಗೀತ ಸಾಹಿತ್ಯಕ್ಕೆ ಬೆನ್ನಾಗಿ ನಿಂತ
ಅರಿಯದಿದ್ದರೂ ಮೆಚ್ಚುವ ರಸಪ್ರಜ್ಞೆ 

ಗುಡ್ಡ ಬೆಟ್ಟ ಪುರಾತನ ದೇಗುಲ ಕೋಟೆ
ನದಿ ಅರಮನೆ ವಾಡೆ ಐತಿಹ್ಯ ರಾಜಮನೆತನ
ಸಾಂಸ್ಕೃತಿಕ ಇತಿಹಾಸ ಇತ್ಯಾದಿ ಏನಿಲ್ಲದಿದ್ದರೂ
ಬಯಲಿನ ನಡುವೆ ಓಯಸಿಸ್ ನಂತೆ ನಾಡಿಗೆ
ಅಕ್ಷರಶಃ ಕೇಂದ್ರವಾಗಿ ನಿಂತ ಮೊದಲಿಗರೂರು
ನನ್ನ ತಾಯ್ನೆಲ ಸುಂದರ ಸೂರ್ಯಾಸ್ತಗಳ
ಬೆಳಕಿನೂರು ದಾವಣಗೆರೆ!

-ಪ್ರಸನ್ನ ರೇವನ್

ಭವಿತವ್ಯ ಮತ್ತು ಪ್ರೇಮ

ತಟಕ್ಕನೆ ಬಿದ್ದ ಸಣ್ಣ ಮಳೆಹನಿಯೊಂದು
ಎಳೆ ಚಿಗುರಿನ ಮೇಲೆ ಬರೆದ ನೀರಿನ ಗೆರೆ

ಬೆಟ್ಟದ ನೆತ್ತಿಯ ಗಿಡ ಮರಗಳೊಳಗೆ
ತಣ್ಣಗೆ ಹಾಯ್ದು ಜಾರಿದ ಬೆಳ್ಮೋಡಗಳು

ಬಳ್ಳಿಗಿಂತ ಆಪ್ತವಾಗಿ ರೆಂಬೆಯನ್ನು
ಬೆಚ್ಚಗೆ ಅಪ್ಪಿದ ಮಿಡಿನಾಗರ

ಮುಟ್ಟಲಾಗದ ಬೈಗುಗೆಂಪಿನಲ್ಲಿ
ಅಡಗಿರುವ ಬಣ್ಣಗಳ ಓಕುಳಿ

ಮರಳ ಕಣಕ್ಕೆ ದಿನವೂ ಮುತ್ತಿಟ್ಟು
ಮುತ್ತಾಗಿಸುವ ಚಿಪ್ಪಿನೊಳಗಿನ ಜೀವದ ಕನಸು

ಬೆಳಕಿನ ನಿರೀಕ್ಷೆಯಿಂದ ನೆಲದಡಿಯ
ಕತ್ತಲಿನಲ್ಲಿ ಮೊಳೆಯುವ ಬೀಜದ ಕಾತರ

ಎಂದೋ ಹುಟ್ಟುವ ಮಗುವಿಗಾಗಿ
ಹಂಬಲಿಸುವ ತಾಯ ಮೊಲೆಗಳು

ಕಾಲವನ್ನು ಮೆಟ್ಟಿ ನಿಲ್ಲಲು ಪ್ರೀತಿಗಲ್ಲದೇ
ಮತ್ಯಾರಿಗೆ ಸಾಧ್ಯ?


- ಪ್ರಸನ್ನ ರೇವನ್  

ಶಿಕಾರಿಪುರ

ಶಿಕಾರಿಪುರ ಎಂದರೆ

ಮಿಡಿ ಮಾವು, ಬಾಳೆ ಮೀನು, ಗೌರೀಭತ್ತ,
ಯಾಡೇರು ಮಾರುವ ಗೋಡಂಬಿ ಹಣ್ಣು
ಅಡುಗೆ ಮನೆಯಲ್ಲಿ ಅಲ್ಲಲ್ಲಿ ಚಲ್ಲಿದ ಅಕ್ಕಿಯ ಗಂಜಿ
ಸಾಗುವಾನಿಮರದ ಮನೆಗಳ ನಡುವೆ
ಬರುವ ಅಡುಗೆ ಮನೆ ಹೊಗೆಯ ವಾಸನೆ...

ಹಚ್ಚಹಸುರಿನ ಭತ್ತದ ಗದ್ದೆಗಳ ನಡುವೆ
ಸಿಕ್ಕುವ ಬುರ್ಲಿ ಹಕ್ಕಿಗಳ ಚಿತ್ತಾರದ ಮೊಟ್ಟೆಗಳು
ಅಜ್ಜಿ ಮಾಡುತ್ತಿದ್ದ ಹುಲ್ಲೇಡಿ ಸಾರು
ವರ್ಣರಂಜಿತ ಜೀರುಗೊಂಬೆ...
ಅಜ್ಜನ ಅಂಗಿಯ ಬೆವರಿನ ಗಂಧ...

ಸಗಣಿ ಸಾರಿಸಿದ ಹಸಿರು ಕೇರಿ ಬೀದಿಯ
ತುಂಬಾ ನಗುವಿನ ರಂಗೋಲಿ
ಹೊಯ್ಯಪ್ಪಳ, ಮೊಸರು ಮೆಣಸಿನಕಾಯಿ
ಕರಿಬೇಟೆಯ ಸಾರು, ಸೆಣಗಿ ಹುಗ್ಗಿಯ ಘಮಲು

ಸ್ನಿಗ್ಧ ಚಲುವಿನ ಮುಗ್ಧ ಮುಖಗಳು
ಹಿತ್ತಲಿನ ಭೂತಪ್ಪ, ನಾಗರ ಕಲ್ಲು
ಮನೆಯೊಳಗೆ ಬೀರಪ್ಪನ ಹೊಳೆಯುವ ಅಲಗು
ಬಂಗಾರಬಣ್ಣದ ತಿಪ್ಪೆಯುದ್ದಕ್ಕೊ ಹರಡಿದ ಅಣಬೆ ಸಾಲು

ಅಲ್ಲೊಂದು ಇಲ್ಲೊಂದು ಹಳೆಯಮರ
ಸಂತೆಯುದ್ದಕ್ಕೊ ಮೈಚಾಚಿದ ದೇವಿಯ ನೆಲ ಶಿಲ್ಪ
ಕೆನ್ನೆ ಕಚ್ಚುವ, ನಗೆಚಾಟಿಕೆಯ ಚಿಕ್ಕಮ್ಮ, ಮಾವಂದಿರು
ದಿನಕೊಂದು ಹೊಸ ಹಾಡು ಹೊಸೆವ
ಜಾನಪದವೇ ಮೈವೆತ್ತಂತ ಅಜ್ಜಿಯ ಕೊರಳು...

ಅರವತ್ತಾದರೂ ರಾಶಿ ಸೌದೆಕೊಚ್ಚುವ ಅಜ್ಜ
ಸಣಿಗೆ ಹುಗ್ಗಿಯ ಸವಿ ಚಪ್ಪರಿಕೆ,
ಏದುಸಿರಿನ ಎತ್ತುಗಳ ಘಂಟೆಯ ನಾದ
ಗರಡಿಯಲಿ ಸಡ್ಡುಹೊಡೆದು ಸೆಣಸಿದ
ಮಲ್ಲರ ಬೆವರಿನ ಕೆಮ್ಮಣ್ಣಿನ ಘಮಲು...

ದೋ ಎಂದು ತೊಳೆವ ಮಳೆಯಲ್ಲೂ
ಹಂಚಿನ ಸಂದಿಯಿಂದ ಸೂಸುವ ಹೊಗೆ
ಅಲ್ಲಲ್ಲಿ ಕಾಣುವ ಹೊಂಡಗಳ ಮೇಲೆ
ಪಚ್ಛೆ ಹಾಸಿದಂತಿದ್ದ ಹಸಿರೆಲೆ
ಎಣ್ಣೆ ಕೊಡೆ ದ್ಯಾಮವ್ವಾ ಎಂದುಲಿಯುವ
ದೀಪಗಳಂತ ಹುಡುಗಿಯರ ದನಿಯಮಲು!

ಮುಗಿಯದ ಚಿತ್ರಗಳ, ನೆನಪುಗಳ
ಒಮ್ಮೊಮ್ಮೆ ಕನಸಿನಂತೆ ಕಾಣುವ ಊರು
ಷಿಕಾರಿಪುರ!

- ಪ್ರಸನ್ನ  ರೇವನ್

ಮರ

ಹಸಿರೆಲೆಗಳ ನಡುವೆ ಹೊಳೆಯುತ್ತಿದ್ದ ಕೆಂಪು
ಹಣ್ಣಿನೆದೆಯಿಂದ ಹೊರಗೆಳೆದು
ತನ್ನ ಹೊಟ್ಟೆಯ ಬೆಚ್ಚನಿತ್ತು ಹಿಕ್ಕೆಯಾಗಿ
ಭೂಮಿಗಿತ್ತಿದ್ದು ಕಪ್ಪು ಕಾಜಾಣ

ಕಾರ್ಮೋಡಗಳ ಆರ್ಭಟಗಳ ನಡುವೆ
ಬೆನ್ನ ಮೇಲೊತ್ತು ಹರಿದು ಹರಡಿ
ಭೋರ್ಗರೆದು ಸುಳಿದಾಡಿ ಕೆಂಪು ಮಣ್ಣಿನ
ಅಪ್ಪುಗೆಗೆಯೊಪ್ಪಿಸಿದ್ದು ಕಪ್ಪು ನದಿ

ನೆಲದ ಕಸುವು, ಬೀಸುವ ತಂಬೆರಲಿನ
ತರು ಲತೆಗಳೊಡನಾಟದ ಟಿಸಿಲಾಟಗಳಿಗೆ
ಗೆಳೆಯರಾಗಿ ಬಂದು ಚಿಗುರ ಕಚ್ಚಿ ಹಿಗ್ಗಿ ಹರಡಿಸಿದವರು
ಕಪ್ಪು ಉಣ್ಣೆಯ ನಾಗಲಾಟದ ಮಿತ್ರರು!

ಹಿಗ್ಗಿ ಬೆಳೆದು ಮೇಘಗಳಿಗೆ ಮುತ್ತಿಕ್ಕಿ
ಸಂದು ಕೊರಕಲುಗಳಲ್ಲಿ ಮನೆಯನಿತ್ತು
ಕೋಟಿ ಮನಸುಗಳ ತಂದು ಮೈಮೇಲೆ
ಪುಟ್ಟ ಹೆಜ್ಜೆಯನಿಡಿಸಿದವರು
ಅಳಿಲು ಪಕ್ಷಿ ಕೀಟ ವಾನರ ಮೂಷಕರು!

ಕಿತ್ತು ಕತ್ತರಿಸಿ ಛೇದಿಸಿ ಉದುರಿಸಿ
ಬೀಳಿಸಿ ಬೇಧಿಸಿ ತಿಕ್ಕಿ ಗುದ್ದಿ ಹೊಡೆದು
ಹೇರಿ ಎಳೆಸಿ ಮುರಿದು ಕೊಳೆಸಿ
ಕೆಟ್ಟ ಮೂಲೆಗೆ ತಳ್ಳಿದವರು ಮಾನವರು

- ಪ್ರಸನ್ನ ರೇವನ್